Құралай Анарбекова «Аға ма әлде неке ме?» комедиясының жалғасын түсірмек

8 Маусым, 2018
BrodKaz
1 199
0

Ең кассалы отандық картиналардың бірі, «Аға ма әлде неке ме» фильмінің авторлары жалғасын түсіруді жоспарлап отыр. Фильм продюсері Құралай Анарбекова алдыңғы жолдары банк тонау туралы таспаның түсіріліміне дайындалып жатқанын мәлімдеген еді. Алайда, көрермендердің сұрауы бойынша аталмыш жобаны тоқтатып, «Аға ма әлде неке ме 2» комедиясымен айналысуды жөн санайды.

Corich Group продюсерлік орталығы жаңа фильмдегі екінші қатардағы және эпизодтық рөлдерге кастинг жариялады. Авторлар қатысуға кинода түсірілім тәжірибесі бар ойын актерларын шақырады. Үміткерлердің жасы, жынысы мен ұлты маңызды емес.

Айта кету керек, «Аға ма әлде неке ме» фильмі актриса Құралай Анарбекованың продюсерлік дебюті болды. Комедия экранға 2017 жылдың қазан айында шықты және бойжеткен мен оның жігітін сынаққа алатын бес ағасы жайлы баяндайды. Таспаға Құралай Анарбекова, Дәурен Серғазин, Нұрлан Сабуров, Әбунасыр Серіков және Тәуекел Мүсілім түсті.

Айналымдағы 11 апта ішінде картина 450 миллион теңгеден астам қаржы жинады.

Комедияның екінші бөліміне арналған кастинг Алматыда мына мекен-жай бойынша өтіп жатыр: Мұратбаев көшесі 94, 3 подъезд, 31-пәтер. Уақыты: 10:00-ден 18:00-ге дейін.