Айналымға «Махаббатпен» қылмыстық комедиясы шықты
Бүгін еліміздің кинотеатрларынан «Махаббатпен» отандық фильмі көрсетіле бастады. Режиссер Александр Гольцев пен продюсер Фархат Әбдірайымовтың шығармашылық жобасын достары мен әріптестері, сондай-ақ БАҚ өкілдері бағалады.
«Махаббатпен» фильмінің басты кейіпкерлері – ересектердің мәселесіне тап болған мектеп түлектері. Русланның Светаға деген ерекше сезімі бар. Алайда, романтикалық хикая аяқ астынан басқа арнаға бұрылады. Жігіттер қылмыс беделдерімен байланысады.
Руслан мен Светаны Әлішер Түлтаев және Мария Королёва сомдады. Фильм екеуі үшін де дебютті болды.
«Кейіпкерім Света – өжет қыз. Мен бала күнімнен бері мектептегі ең сұлу қыз болуды армандадым. Нәтижесінде, сол бейнені кинода сомдадым. Мен үшін қонақ үйдегі түсірілім қиынға соқты, яғни ол түсірілімде кейіпкерді қылмыскерлер қорқытады. Сахналас жұбым Сергей Никоненко болғандықтан, эмоционалды тұрғыда қиын болды. Мен одан шынымен де қорықтым. Кейін, түсірілімнен соң екеуіміз достасып кеттік, ол өте ақкөңіл, елгезек адам екен. Түсірілім кезінде Виталий Давыдовтың да көмегі көп тиді, Әлішер екеуіміз актерлік шеберлік курсын сол кісіден өттік», - деді Мария.
Көрермендер картинадан жас актерлардан бөлек, Гүлнар Сильбаеваны, Жандос Айбасовты, Максим Акбаров пен Роман Альманскийді көре алады.
Режиссер әрі сценарист Александр Гольцевтің айтуынша, олар киноның жанрын ұзақ уақытқа дейін анықтай алмаған. Нәтижесінде, Фархат Әбдірайымовпен бірге «Махаббатпен» фильмін қатал комедия деп атауды ұйғарған.
«Туындымыз жартылай комедия, жартылай драма, жартылай жастар мелодрамасы болып шықты. Дегенмен, фильмімізді комедия ретінде көрдік. Фокус топта сынамалы көрсетілім өткіздік. Сауалнама нәтижесінде, көпшілігі картинаны қылмыстық, қатал комедия ретінде көрді», - деп түсіндірді Гольцев.
«Махаббатпен» фильмінің көрсетілімі туралы толығырақ афишадан біле аласыздар.
пікірлер жоқ, бірінші болыңыз
Пікір қалдыру үшін