Парижде екі қазақстандық фильм көрсетілді
Парижде «Анаға апарар жол» драмасы және «Қазақ елі» анимациялық фильмінің көрсетілімі болды. Шара ЮНЕСКО-ның «Әлемдегі заманауи қазақстандық мәдениет» жобасы аясында өтті. Көрсетілімге актриса Алтынай Нөгербек және режиссер Батырхан Дәуренбеков қатысты.
«Анаға апарар жол» көркем фильмі - режиссер Ақан Сатаевтың жұмысы. Бұл - тағдырдың өзі айырған ана мен бала туралы хикая. Бірақ, өмірдің қиындықтарына қарамастан, екеуі бір-бірін іздеп табады. Таспадағы кейіпкерлерді Алтынай Нөгербек, Әділ Ахметов және Аружан Жазылбекова сомдады.
Суреттерді Ш. Айманов атындағы «Қазақфильм» киностудиясының баспасөз қызметі ұсынды
Айта кету керек, кинотаспа шетелдік көрерменге алғаш ұсынылып отырған жоқ. Туынды «Еуразия көпірі» ХКФ-нің, 38-ші Мәскеу кинофестивалінің қатысушы әрі жүлдегері, «Ақ Ілбіріс» киножүлдесінің және Нью-Йорктегі 5-ші Еуразия фестивалінің қатысушы болған.
Батырхан Дәуренбековтың «Қазақ елі» мультфильмі Қазақ хандығының негізін қалаған Жәнібек пен Керей сұлтандар туралы баяндайды. «САҚ» студиясының негізінде түсірілген картина Каирдегі 10-шы Халықаралық анимациялық кино форумында «Үздік толықметражды фильм» деп танылды.
Отандық фильмдер көрсетілімі ҚР Мәдениет және спорт министрлімен және «Қазақфильм» киностудиясымен ұйымдастырылған.
пікірлер жоқ, бірінші болыңыз
Пікір қалдыру үшін